SPORT YULDUZLARI ULAR BUGUN URGANCH OLIMPIA VA PARALIMPIA SPORT TURLARIGA TAYYORLASH MARKAZIDA KAMOLGA YETMOQDA

Sportga sog‘lik garovi, tinchlik elchisi deya ta’rif beriladi. Chindan ham kimki, sport bilan shug‘ullanibdi, har doim bardam, tetik. Qolaversa, sport xalqlarni, mamlakatlarni bir-biriga yaqinlashtiradi. “Hech bir narsa mamlakatni sportchalik tez dunyoga tanitolmaydi” degan edi Birinchi Prezidentimiz soha vakillari bilan bir galgi uchrashuvida.  

Bugun ham yurtimizda jismoniy tarbiya va sportni ommalashtirishga katta e’tibor   qaratilmoqda. Davlatimiz rahbari tomonidan O‘zbekiston bayrog‘ini  jahon arenalarida baland ko‘tarayotgan yoshlarimizning munosib rag‘batlantirilayotganligi o‘g‘il-qizlarimizda bu sohaga bo‘lgan qiziqishni tobora oshiryapti. 

Shubhasiz, Urganch olimpia va paralimpia sport turlariga tayyorlash markazida ertanggi mashhur sportchilar tarbiyalanayotir. Xususan, karate WKF yo‘nalishida 15 nafar yosh iqtidor sohiblari shug‘ullanishyaptiki, ular erishayotgan muvaffaqiyat ko‘pchilikning havasini keltirmoqda. Zero, bu bir necha bor O‘zbekiston chempionlari Dildor Annadurdiyeva, Diyorbek Boboyev, Feruzbek Ro‘zmetov kabi oliy va birinchi toifali murabbiylarning ham mehnatlari mahsulidir. 

D.Annadurdiyeva Urganch davlat universitetining jismoniy madaniyat fakultetida o‘qib yurgan kezlaridayoq sport olamida o‘zini ko‘rsatishga muvaffaq bo‘lgan edi. Chunonchi, 2017-2021 yillarda surunkasiga O‘zbekiston  chempioni sharafini himoya qilgan. 2017-yilda bo‘lib o‘tgan Osiyo chempionatida faxrli uchinchi o‘rin sohibasiga aylangan. Xalqaro toifadagi sport ustasi mana, to‘rt yildirki, ushbu markazda sidqidildan xizmat qilmoqda. Oliy ta’lim tahsilidan so‘ng mehnat faoliyatini Urganch yakkama-yakka kurash sport turlariga tayyorlash maktabida boshlagan D. Boboyevni  ham mazkur markaz ish boshlagach, birga faoliyat yuritishga taklif etishdi. F. Ro‘zmetov jamoaning eng yosh murabbiyi bo‘lsada, o‘quvchilarining yutuqlaridan boshi osmonga yetyapti. O‘zi ham ustozlari izidan borib, dastlabki natijalarni ko‘rsatmoqda.

Markazning 10-sinfida ta’lim olayotgan Sevinch Egamberdiyeva  o‘tgan yil birvarakayiga O‘zbekiston chempionati hamda O‘zbekiston kubogida g‘oliblikka erishib, maktabdoshlarini qoyil qoldirdi. Sport ustasi darajasini qo‘lga kiritganligi esa barchani quvontirdi. 7-sinf o‘quvchisi Kamron Bekturdiyev joriy yilning aprelida o‘tkazilgan O‘zbekiston chempionatida g‘oliblik shohsupasiga ko‘tarilib, ustozlari ishonchini oqladi.

 Kezi kelganda shuni ta’kidlash kerakki, markazning bu yilgi bitiruvchilaridan Jahongir Ziyodov, Mohichehra Abdirimova, Jahongir Boltaboyev, Sevinch Reyimboyevalar sport ustasi bo‘lganliklari bois viloyatimizdagi oliy ta’lim dargohlariga davlat granti asosida o‘qishga qabul qilindilar. 2023-yilning noyabr oyida Xitoyda o‘tkazilgan XXXII yozgi Osiyo o‘yinlari g‘olibi bo‘lgan, bugungi kunda respublika terma jamoasi safida faoliyat ko‘rsatayotgan Sevinch Rahimova sobiq bitiruvchi bo‘lib markazning faxriga aylangan.

- O‘quvchilarimiz safini sportga ixlosi baland, shu sohada o‘zini ko‘rsatayotgan yoshlar hisobiga kengaytirib boryapmiz, - deydi murabbiy D.Annadurdiyeva. – Binobarin, bu yil shahardagi 28-maktabda o‘qiyotgan Malikabonu Yusupovani markazimizga qabul qildik. U endigina 5-sinfga qadam qo‘ygan bo‘lsada, viloyat chempioni bo‘lishga ulgurgan. Malikabonudan umidimiz katta.

H.BEKNIYOZOVA,