BOLALAR QANDAY HUQUQLARGA EGA?

Yashash huquqi har bir bolaning uzviy huquqidir. Bola hayotiga suiqasd qilish eng og‘ir jinoyatdir.

Davlat sog‘lom bolaning tug‘ilishi va rivojlanishini ta’minlash uchun sharoit yaratadi.

O‘zbekiston Respublikasi "Bola huquqlarining kafolatlari to‘g‘risida"gi qonuniga ko‘ra, har bir bola:

•  tug‘ilgandan e’tiboran familiya, ism, ota ismi olish, millati va fuqaroligiga ega bo‘lish;

•  erkinlik, shaxsiy daxlsizlik, turar joyi daxlsizligi va xat-xabarlarini sir tutish;

•  o‘z sha’ni va qadr-qimmatiga tajovuzlardan, shaxsiy hayotiga g‘ayriqonuniy aralashuvlardan himoyalanish; 

•  turar joyli bo‘lish; 

•  o‘zining yoshi, sog‘lig‘ining holati va kasbiy tayyorgarligiga muvofiq mehnat qilish, kasbni erkin tanlash, adolatli mehnat sharoitlarida ishlash;

•  o‘zining yoshi, sog‘lig‘i hamda ehtiyojlariga mos keladigan dam olish va bo‘sh vaqtga bo‘lish;

•  sog‘lig‘ini saqlash;

•  xususiy mulk va boshqa huquqlarga ega.

Bolalar ishga 16 yoshdan qabul qilinishi mumkin. 

Bola qonunga asoslanmagan holda ushlab turilishi, hibsga olinishi, qamoqqa olinishi mumkin emas.

Davlat: 
 •  bolaning shaxsi, uy-joyi daxlsizligini, xat-xabarlari sir tutilishini ta’minlaydi hamda bolani ekspluatatsiya va zo‘ravonlikning barcha shakllaridan himoya qiladi;

•  bolaning bepul majburiy umumiy o‘rta ta’lim va o‘rta maxsus ta’lim olishini ta’minlaydi;

•  bolalarga qonunchilikka muvofiq hajmda bepul tibbiy yordamni kafolatlaydi.

Tursunboy URAZBAYEV,

Tuproqqal’a tumani yuridik xizmat ko‘rsatish markazi bosh yuriskonsulti.