Вазирлар Маҳкамасининг 05.08.2024 йилдаги «Солиқ тўловчиларни ҳисобга қўйиш соҳасидаги айрим давлат хизматларини кўрсатиш бўйича маъмурий регламентларни тасдиқлаш тўғрисида» 2022 йил 2 апрелдаги 150-сон қарорига ўзгартириш ва қўшимчалар киритиш, шунингдек, айрим қарорларини ўз кучини йўқотган деб ҳисоблаш ҳақида»ги 480-сонли қарори қабул қилинди.
Ҳужжат билан юридик шахсларга СТИР бириктириш бўйича регламент тасдиқланмоқда.
СТИР бир маротаба берилади ва юридик шахс тугатилгандан сўнг ушбу СТИР бошқа солиқ тўловчига бириктирилмайди.
Маълумот учун: 2021 йил 1 июлдан бошлаб солиқ тўловчи-жисмоний шахсларнинг ҳисобини юритиш ЖШШИР орқали амалга оширилади. Жисмоний шахсга СТИР бериш давлат хизмати тўхтатилган.
СТИР Солиқ қўмитаси томонидан қуйидаги жараёнларда берилади:
нодавлат нотижорат ташкилотларига адлия органларида давлат рўйхатидан ўтказиш жараёнида;
банклар, кредит бюролари ва чет эл банкларининг ваколатхоналарига Марказий банк томонидан давлат рўйхатидан ўтказиш (аккредитация қилиш) жараёнида;
дипломатик ваколатхоналар, хорижий давлатларнинг консуллик муассасалари ва халқаро ташкилотларнинг ваколатхоналарига Ташқи ишлар вазирлигида аккредитациядан ўтказиш жараёнида;
хорижий тижорат ташкилотларининг ваколатхоналарига Инвестициялар, саноат ва савдо вазирлигида аккредитациядан ўтказиш жараёнида;
бошка юридик шахсларга давлат хизматлари марказларида давлат рўйхатидан ўтказиш жараёнида.
Рўйхатга олувчи органларнинг сўровномалари Солиқ қўмитасининг тизимида реал вақт режимида, бироқ 1 иш кунидан кўп бўлмаган муддатда текширувдан ўтказилади.
Идентификация рақамини нотўгри ёки ноаниқ кўрсатиш солиқ тўловчиларнинг идентификация рақамларини қўлланиш тартибини бузишга тенглаштирилади.
Турсунбой УРАЗБОЕВ,
Тупроққала тумани юридик хизмат кўрсатиш маркази бош юрисконсулти.