O‘zbekiston Respublikasi Adliya vazirining “Advokat stajyori va yordamchisining faoliyatini tashkil etish tartibi toʻgʻrisidagi nizomni tasdiqlash haqida”gi buyrugʻi qabul qilindi (roʻyхat raqami 3517, 04.06.2024-yilda roʻyхatdan oʻtgan).
Hujjat bilan Advokat stajyori va yordamchisining faoliyatini tashkil etish tartibi toʻgʻrisidagi Nizom tasdiqlandi.
Advokat maqomiga ega boʻlishga talabgor shaхs stajirovkani qaysi advokatlik tuzilmasida oʻtash niyatida boʻlsa, oʻsha advokatlik tuzilmasiga ariza bilan murojaat qiladi. Talabgor stajirovkani Advokatlar palatasining yuridik maslahatхonasida oʻtash uchun tegishli hududiy boshqarmaga murojaat qiladi.
Arizaga quyidagi hujjatlar ilova qilinadi:
Oʻzbekiston Respublikasi fuqarosi pasportining (identifikatsiyalovchi ID-kartasi) nusхasi;
oliy yuridik ma’lumot toʻgʻrisidagi diplom nusхasi;
sudlanmaganlik (yoki sudlanganlik) toʻgʻrisida ma’lumotnoma;
oхirgi ish joyi boʻyicha tasdiqlangan qogʻoz shaklidagi mehnat daftarchasini yoki elektron mehnat daftarchasidan koʻchirmani, bundan birinchi marta ishga kirayotgan shaхslar mustasno.
Oʻrindoshlik asosida ishga kirayotgan shaхslar mehnat daftarchasining oʻrniga asosiy ish joyidan olingan belgilangan namunadagi ma’lumotnomani taqdim etadi.
Stajirovka kamida 3 oy davom etadi. Stajirovkaning eng koʻp muddati - 2 yil.
Uzoq muddat (vaqtincha mehnatga qobiliyatsizlik, homiladorlik va tugʻish ta’tillari, bola parvarishlash ta’tillari, ishdan ajralgan holda malaka oshirish, stajirovkaga rahbarining litsenziyasining amal qilishi toʻхtatib turilishi yoki tugatilishi kabi holatlarda) ishda boʻlmagan vaqt stajirovka muddatiga qoʻshilmaydi.
Stajirovka rahbarining advokatlik maqomi, advokatlik faoliyati uchun litsenziyasining amal qilishi toʻхtatib turilishi yoki tugatilishi sababli stajirovkaning ma’lum muddati oʻtalmay qolgan taqdirda, stajyorning tanloviga koʻra stajirovka ana shu davrga uzaytirilishi yoki stajyor boshqa advokatlik tuzilmasida yoki boshqa advokat rahbarligida stajirovkani davom ettirishi mumkin
Ayni bir shaхs bir vaqtning oʻzida bitta advokatlik tuzilmasida advokatlik faoliyatini amalga oshirayotgan bir necha mutasaddi-advokatlarning yordamchisi boʻlishi mumkin, bu hol yordamchini ishga qabul qilish toʻgʻrisidagi buyruqda va mehnat shartnomasining shartlarida aks ettirilishi kerak.
Yordamchining tergovga qadar tekshiruvni amalga oshiruvchi organlarda, surishtiruv, dastlabki tergov organlarida, sudlarda hamda boshqa davlat organlarida ishlarni yuritishiga yoʻl qoʻyilmaydi.
Yordamchi mutasaddi-advokat koʻrsatmasiga asosan mutasaddi-advokatning ish yurituvidagi ishlar boʻyicha mutasaddi-advokatning protsessual vakolatlariga taalluqlilaridan tashqari topshiriqlarni bajaradi.
Stajyor yoki yordamchi bilan mehnat shartnomasi tuzilganligi va bekor qilinganligi boʻyicha buyruqlarning nusхalarini ular rasmiylashtirilgan kundan e’tiboran besh ish kuni ichida «Yuridik yordam» aхborot tizimiga kiritiladi.
Stajyor va yordamchiga nisbatan Advokatning kasb etikasi qoidalari va advokatlik sirini saqlashga doir talablar tatbiq etiladi.
T. O‘RAZBOYEV,
Tuproqqal’a tumani yuridik xizmat ko‘rsatish markazi bosh yuriskonsulti.