IТ-СЕРТИФИКАТ ОЛИШ ХАРАЖАТЛАРИНИ ЯИДХП ОРҚАЛИ ҚОПЛАШ МУМКИН

Вазирлар Маҳкамасининг 17.02.2024 йилдаги “Халқаро IТ-сертификатларга эга бўлган ёш мутахассисларни рағбатлантиришга оид қўшимча чора-тадбирлар тўғрисида”ги 95-сон қарори қабул қилинди.

Президентнинг 01.02.2024 йилдаги “Рақамлаштириш соҳасида малакали мутахассислар тайёрлаш фаолиятини қўллаб-қувватлаш бўйича қўшимча чора-тадбирлар тўғрисида”ги ПҚ-51-сон қарорига мувофиқ 2024 йил 1 мартдан бошлаб:

• халқаро IT-сертификатларга эга ёшларнинг ўқиш ҳамда ушбу сертификатларни олиш харажатларининг 60 фоизгача бўлган қисми;
• инглиз тилини билиш бўйича B2 ва ундан юқори даражадаги сертификатга эга бўлган ёшларнинг халқаро IT-сертификатлар олиш харажатлари тўлиқ қоплаб берилади.

Ҳужжат билан Ёшларнинг халқаро IT-сертификатларни олиш харажатларини қоплаб бериш бўйича давлат хизматини кўрсатишнинг маъмурий регламенти тасдиқланди.

Халқаро IT-сертификатларга эга бўлган ёшларнинг харажатларини қоплаб бериш бўйича давлат хизматларини кўрсатиш учун масъул ваколатли орган этиб Рақамли технологиялар вазирлиги белгиланди.

Регламентга асосан, ариза берувчи халқаро IT-сертификат берилган санадан бошлаб 180 календарь кун мобайнида мазкур сертификатни олиш харажатларини қоплаб беришни сўраб ЯИДХПга мурожаат қилади.

Халқаро IT-сертификат олиш харажатларини қоплаб бериш шартлари:

• талабгор бошланғич даражада бўлганда 30 фоиз, ўрта даражада бўлганда – 40 фоиз, профессионал даражада бўлганда – 60 фоиз миқдорда сарфланган харажатлар қоплаб берилади;
• инглиз тили бўйича В2 ва ундан юқори даражадаги сертификатга ҳамда профессионал даражадаги халқаро IT-сертификатга эга бўлган ёшларнинг харажатлари тўлиқ қоплаб берилади.

Ҳужжат Қонун ҳужжатлари маълумотлари миллий базасида эълон қилинган ва 19.02.2024 йилдан кучга кирди.  

С.БЕРДИКИЛИЧОВ, 

Урганч тумани юридик хизмат кўрсатиш маркази бош юрисконсульти.