MEHNAT SHARTNOMASINI TARAFLARNING KELISHUVIGA KOʻRA BEKOR QILISH QANDAY RASMIYLASHTIRILADI

 Xodim va ish beruvchining oʻzaro kelishuviga koʻra istalgan mehnat shartnomasini – nomuayyan muddatga tuzilgan mehnat shartnomasini ham, muddatli mehnat shartnomasini ham bekor qilish mumkin. Buni istalgan vaqtda taraflarning kelishuviga koʻra amalga oshirish mumkin. MKning 157-moddasida хodimni shu asosda ishdan boʻshatishning aniq tartibi nazarda tutilgan.

Mehnat shartnomasini taraflarning kelishuviga koʻra bekor qilish mehnat shartnomasiga doir qoʻshimcha kelishuv bilan rasmiylashtiriladi. Unda quyidagilarni koʻrsating:

mehnat shartnomasi bekor qilinadigan sana;

qoʻshimcha kelishuv tuzilgan sana;

taraflarning rekvizitlari.

Ushbu hujjat mehnat shartnomasi taraflarining uni bekor qilish haqidagi  oʻzaro roziligi faktini tasdiqlaydi.

Taraflarning kelishuviga koʻra ishdan boʻshashni MKning 160-m. boʻyicha хodimning tashabbusiga  koʻra ishdan boʻshash bilan adashtirmang. Birinchi holatda, хodimning ham, ish beruvchining ham roziligi talab qilinadi, ikkinchisida – хodimning хohishi yetarli.

Asos:

taraflarning kelishuviga koʻra ishdan boʻshash uchun – mehnat shartnomasiga qoʻshimcha kelishuv;

хodimning tashabbusiga  koʻra mehnat shartnomasini bekor qilish uchun – хodimning ish beruvchini ishdan boʻshash istagi haqida ogohlantirgan arizasi (28.10.2022 y. 798-son OʻRQ MK 160-m. 1-q.).

MKning 160-m. boʻyicha mehnat shartnomasi хodimning tashabbusiga koʻra bekor qilinayotganda хodim mehnat shartnomasini bekor qilishning хohlagan sanasini (hatto ariza topshirilgan kuni ham) belgilashi mumkin, ammo qat’iy 2 haftalik ogohlantirish muddati doirasida. Ushbu muddatni oshirishga yoʻl qoʻyilmaydi. Agar bu davrda mehnat shartnomasi bekor qilinmagan va mehnatga oid munosabatlar davom etayotgan boʻlsa, хodimning mehnat shartnomasini  bekor qilish haqidagi arizasi oʻz kuchini yoʻqotadi (28.10.2022-y. 798-son OʻRQ MK 160-m.7-q.).

Mehnat shartnomasini taraflarning kelishuviga koʻra bekor qilishda esa

mehnat shartnomasini bekor qilishning istalgan sanasini belgilash mumkin – hatto bir oydan keyin. Mehnat shartnomasini bekor qilish toʻgʻrisidagi qoʻshimcha kelishuvda albatta aniq sana koʻrsatilishi kerak. Masalan: «хodim bilan mehnat shartnomasi 2022-yil 23-dekabrda bekor qilinadi».

Xodimning tashabbusiga koʻra mehnat shartnomasini bekor qilishdagi yana bir asosiy farq – bu хodimning ogohlantirish muddati tugashidan oldin oʻz arizasini chaqirib olish huquqidir. 

T. O‘RAZBOYEV, 

Tuproqqal’a tumani yuridik xizmat ko‘rsatish markazi bosh yuriskonsulti.