BA’ZI KO‘CHALAR NOGIRONLIGI BO‘LGAN SHAXSLAR UCHUN MOSLASHTIRILADI

O‘zbekiston Respublikasi Prezidentining 18.07.2024-yildagi   "Nogironligi bo‘lgan shaxslarga qulay va to‘siqlarsiz muhit yaratish bo‘yicha qo‘shimcha chora-tadbirlar to‘g‘risida"gi PQ-266-sonli qarori qabul qilindi.

Mahalliy ijro hokimiyati organlari har yili 1-noyabrgacha keyingi yilga o‘z hududidagi kamida bitta ko‘chani nogironligi bo‘lgan shaxslar ehtiyojlariga moslashtirish loyihasini ishlab chiqadilar, shuningdek, uni qurish, ta’mirlash va jihozlash ishlarini amalga oshiradilar. 

2024-yil 1-dekabrgacha ko‘chalar (ro‘yxat bo‘yicha) shaharsozlik normalari va qoidalari talablaridan kelib chiqib, nogironligi bo‘lgan shaxslarning to‘siqsiz harakatlanishiga moslashtirilishi nazarda tutilgan. 

Bundan tashqari, 2026-yil 1-yanvargacha respublikaning nogironligi bo‘lgan shaxslar harakatlanishi uchun to‘siqsiz muhit yaratilgan ob’ektlari bilan "Interaktiv xarita" axborot tizimi ishga tushiriladi. 

2024-yil 1-oktyabrdan boshlab Toshkent shahri bo‘yicha avtobus yo‘lovchi tashish yo‘nalishlarini joylashtirish va xalqaro avtobus yo‘lovchi tashish, 2025-yil 1-yanvardan boshlab esa – Qoraqalpog‘iston Respublikasi, shuningdek, viloyatlararo, shahar atrofi, tumanlararo (shaharlararo) qatnovlar bo‘yicha avtobus yo‘lovchi tashish yo‘nalishlarini joylashtirish bo‘yicha tenderlarda nogironligi bo‘lgan shaxslar uchun maxsus jihozlangan avtobuslarga ega bo‘lgan tashabbuskorlar ishtirok eta oladilar. 

2024-yil 1-noyabrdan ushbu talab kuchga kirgunga qadar Qoraqalpog‘iston Respublikasida, viloyatlararo, shahar atrofi, tumanlararo (shaharlararo) qatnovlarda avtobus yo‘lovchi tashish xizmatlarini ko‘rsatayotgan, tenderlarda g‘olib bo‘lgan tadbirkorlik sub’ektlariga avtobuslarni nogironligi bo‘lgan shaxslar ehtiyojlariga moslashtirish xarajatlarining 50 foizigacha, biroq  BHMning 30 baravaridan oshmagan miqdorda qoplanadi.

Tursunboy URAZBAYEV,

Tuproqqal’a tumani yuridik xizmat ko‘rsatish markazi bosh yuriskonsulti.