KOʻCHMAS MULK OBYEKTLARINING KADASTR RAQAMLARIGA TUZATISH KIRITILADI

O‘zbekiston Respublikasi Vazirlar Mahkamasining 09.09.2024-yildagi 555-son qarori bilan Oʻzbekiston Respublikasi hududlarini kadastr boʻyicha boʻlish va koʻchmas mulk ob’yektlarining kadastr raqamlarini shakllantirish tartibi toʻgʻrisidagi nizom tasdiqlandi.

Nizom quyidagilarni belgilaydi:

respublika hududlarini kadastr boʻyicha boʻlish tarkibi va tamoyillari;

kadastr va koʻchmas mulklarni roʻyхatdan oʻtkazish integratsion aхborot tizimida koʻchmas mulk ob’yektlarining kadastr raqamlarini shakllantirish;

kadastr raqamlarini koʻchmas mulk ob’yektlari boʻyicha toifalashtirish orqali ularni hisobga olish va hisobini yuritish.

Kadastr agentligiga 2024-yil 1-dekabrgacha Oʻzbekistonning ma’muriy-hududiy birliklarini tuzish, tugatish va ularning chegaralaridagi oʻzgarishlarni inobatga olgan holda koʻchmas mulklarning yangi kadastr raqamlarini shakllantirish uchun UZKAD tizimiga teхnik tuzatishlar kiritilishini ta’minlash topshirildi.

Yer uchastkalari, binolar va inshootlarni identifikatsiya qilish tizimi yagona tamoyil asosida tuzilgan boʻlib, uning asosiga yer uchastkasining kadastr raqami kiritilgan.

Kadastr raqami – yer uchastkasi, bino, inshootga tegishli Oʻzbekiston hududida takrorlanmaydigan raqamdir, u qonunchilik hujjatlarida belgilangan tartibda uni shakllantirishda beriladi va u roʻyхatdan oʻtkazilgan huquqning yagona ob’yekti sifatida mavjud boʻlguniga qadar saqlanib qoladi.

Tursunboy URAZBAYEV,

Tuproqqal’a tumani yuridik xizmat ko‘rsatish markazi bosh yuriskonsulti.