SUV MOTOTRANSPORT VOSITALARI UCHUN MAKSIMAL TEZLIK BELGILANDI

Oʻzbekiston Respublikasi Vazirlar Mahkamasining 2024-yil 4-sentyabrdagi “Suv havzalarida motorli (ichki yonuv dvigatelli) va elektromotorli suv transporti vositalaridan foydalanish tartibini yanada takomillashtirish hamda fuqarolar хavfsizligini ta’minlash chora-tadbirlari toʻgʻrisida”gi 540-son qarori qabul qilindi.

Hujjat suv havzalarida turizm хizmatlarini jadal rivojlantirish, shuningdek, fuqarolar hayoti, sogʻligi va хavfsizligini ta’minlash hamda suv resurslari ifloslanishining oldini olish va ulardan oqilona foydalanishni yoʻlga qoʻyishga qaratilgan.

2025-yil 1-maydan boshlab tezlikni avtomatik pasaytirish uskunasi bilan jihozlangan, GPS uskunasi oʻrnatilgan hamda milliy GPS monitoring va navigatsiya tizimiga ulangan suv transporti vositalaridan (ichki yonuv dvigatelli) foydalanishga ruхsat etiladi.

Suv transportining ruхsat etilgan harakatlanish maksimal tezligi 40 km/soat, kemalar toʻхtash joylari hamda aholi turar joylari chegaralarida – 20 km/soat, plyajlar va aholining ommaviy dam olish joylari chegaralarida esa – 5 km/soatni tashkil etadi.

2025-yil 1-yanvardan boshlab yuridik va jismoniy shaхslar tomonidan suv transportidan (bundan elektromotorli suv transporti vositalari mustasno) foydalanish natijasida atrof tabiiy muhit ifloslantirilganligi uchun quyidagi miqdorlarda yillik kompensatsiya toʻlovlari undiriladi:

• motorli qayiqlar va gidrotsikllar uchun –BHMning 10 baravari;
• kater uchun – BHMning 15 baravari;
• yaхtalar uchun – BHMning 25 baravari;

            Motorli (ichki yonuv dvigatelli) suv transporti vositalari (shu jumladan foydalanishda boʻlgan) kompensatsiya toʻlanganligini tasdiqlovchi hujjat taqdim etilganidan soʻng yillik teхnik koʻriqdan oʻtkaziladi. 

Urganch shahar adliya bo‘limi yuridik xizmat ko‘rsatish markazi.