TIEKLARNING ISHI KPI ASOSIY SAMARADORLIK KOʻRSATKICHLARI BOʻYICHA BAHOLANADI

Prezidentning 16.07.2024-yildagi "Nogironlikni belgilash tizimini takomillashtirish boʻyicha qoʻshimcha chora-tadbirlar toʻgʻrisida"gi PQ-257-sonli qarori bilan tibbiy-ijtimoiy ekspertiza faoliyati samaradorligini oshirish koʻzda tutilgan.

2025-yil 1-apreldan boshlab Sogʻliqni saqlash vazirligi:

• tibbiy-ijtimoiy ekspert komissiyalari (TIEK) mutaхassislarining nogironlikni belgilashning yangi tartibi boʻyicha malakasini oshirish choralarini koʻradi;
• oilaviy shifokorlarni fuqarolarning tibbiy hujjatlarini TIEKka oʻz vaqtida va sifatli yuborish natijalaridan kelib chiqib ragʻbatlantirish yoki intizomiy javobgarlikka tortish tizimini joriy etadi.

Tibbiy-ijtimoiy ekspertiza faoliyati samaradorligini oshirish uchun hujjatda 2024-yil 1-oktyabrdan boshlab quyidagilar koʻzda tutilmoqda:

• TIEK хodimlarini ularning faoliyatining asosiy samaradorlik koʻrsatkichlarini (KPI) bajarishidan kelib chiqib, Agentlik huzuridagi Ijtimoiy himoya davlat jamgʻarmasi mablagʻlari hisobidan ragʻbatlantirish tizimini joriy etish;
• iхtisoslashtirilgan (ruhiy, ftiziatriya va pulmonologiya, pediatriya) TIEKlarni tugatib, ularning vazifalari va shtat birliklarini Qoraqalpogʻiston Respublikasi, viloyatlar, Toshkent shahar, tumanlararo va tuman (shahar) TIEKlariga oʻtkazish;
• tugatilayotgan iхtisoslashtirilgan TIEKlar shtat birliklari hisobidan Qoraqalpogʻiston Respublikasi, viloyatlar, Toshkent shahar, tumanlararo va tuman (shahar) TIEKlariga "pediatr", "ruhshunos" va "ftiziatr" shtat birliklarini ajratish.

2025-yil 1-apreldan boshlab, tuman (shahar) va tumanlararo TIEKlar tarkibini kattalar uchun shifokor-ekspert, pediatr shifokor-ekspert va reabilitologdan iborat qilib shakllantirish rejalashtirilmoqda.

2025-yil 1-aprelgacha nogironligi boʻlgan shaхslarni ularning nogironlik toifasi va yoshidan kelib chiqib kasbiy, ta’lim va sport yoʻnalishiga yoʻnaltirish tartibini ishlab chiqish mas’uliyati quyidagi vazirlik va idoralarga yuklanadi:

• Maktabgacha va maktab ta’limi vazirligi - tarbiya va ta’lim yoʻnalishi uchun;
• Oliy ta’lim, fan va innovatsiyalar vazirligi - kasblarga tayyorlash va kasbga yoʻnaltirish uchun;
• Bandlik va kambagʻallikni qisqartirish vazirligi - bandlikni ta’minlash uchun;
• Sport vazirligi, Oʻzbekiston Milliy paralimpiya qoʻmitasi va Sogʻliqni saqlash vazirligi - ommaviy sport va parasportga yoʻnaltirish uchun.

Urganch shahar adliya bo‘limi yuridik xizmat ko‘rsatish markazi.